მარტვილში დასრულდა „მოყვარულთა თასი 2017“-ის მუნიციპალური გათამაშება, რომელშიც მარტვილის მუნიციპალიტეტის 8 გუნდი იღებდა მონაწილეობას.
„მოყვარულთა თასი 2017“-ს ხელმძღვანელობს და ორგანიზებას უწევს „საქართველოს სამოყვარულო ფეხბურთის ასოციაცია“, მხარდამჭერი და პარტნიორია საქართველოს ფეხბურთის ფედერაცია და ქართული ფეხბურთის განვითარების ფონდი. ჩემპიონატი იმართება მუნიციპალური, რეგიონალური და ფინალური ეტაპად.
„მოყვარულთა თასი 2017“ მიმდინარე წლის 25 მარტს დაიწყო და ა.წ-ის 2 დეკემბერს დასრულდება. ჩემპიონატში მონაწილეობას 40 მუნიციპალიტეტის 350 სამოყვარულო საფეხბურთო გუნდი იღებს და ფინალური ეტაპი თბილისში გაიმართება.
მარტვილის მუნიციპალური ჩემპიონატის დასრულების შემდეგ რეგიონალურ ეტაპზე გავიდა მარტვილის სოფ. სერგიეთისა და სოფ. ბანძის გუნდები.
აღნიშნულ გუნდებს შორის ფინალური შეხვედრა 17 მაისს გაიმართა და სამოყვარულო საფეხბურთო გუნდ „ბანძა“-ს გამარჯვებით დასრულდა. გათამაშების ორგანიზატორებმა და მარტვილის საფეხბურთო სკოლის დირექტორმა ფინალისტ გუნდებს და მატჩის საუკეთესო ფეხბურთელებს სიმბოლურად თასები და მედლები გადასცა.
„მოყვარულთა თასი 2017“ მიზნად ისახავს ფეხბურთის მასობრიობის გაზრდას, ფეხბურთის შემდგომ განვითარებასა და პოპულარიზაციას, ჯანსაღი და სპორტული ცხოვრების წესის დამკვიდრებას, ნიჭიერი ახალგაზრდა ფეხბურთელების აღმოჩენას, სპორტული ინფრასტრუქტურის აღდგენასა და ამოქმედებას, ვეტერანი ფეხბურთელების დაბრუნებას ფეხბურთში, დამწყები მწვრთნელებისა და მსაჯების პროფესიული განვითარების ხელშეწყობას და საქართველოს სამოყვარულო ფეხბურთის ეროვნული ნაკრების კანდიდატების შერჩევასა და მომზადებას.
