19 ოქტომბერს მარტვილის მუნიციპალიტეტის გამგეობის სხდომათა დარბაზში „ტეხური ენერჯის“ ხელმძღვანელებმა და წარმომადგენლებმა ადგილობრივ მოსახლეობასთან შეხვედრა გამართეს.
შეხვედრის მიზანს, მარტვილის მუნიციპალიტეტის ტერიტორიის ფარგლებში არსებულ მდინარე ტეხურზე, ჰიდროელექტროსადგურების კასკადის პროექტის გარემოზე ზემოქმედების შეფასების (გზშ) ანგარიშის, კიდევ ერთხელ საჯაროდ განხილვა წარმოადგენდა. როგორც მოსახლეობისთვის ცნობილია, მსგავსი საჯარო განხილვა 2016 წლის 12 იანვარსაც გაიმართა, თუმცა წარმოდგენილ ანგარიშთან დაკავშირებით საქართველოს გარემოსა და ბუნებრივი რესურსების დაცვის სამინისტრომ წარმოადგინა შენიშვნები და რჩევები, რის გამოც „ტეხური ენერჯის“–ის მიერ საჭირო გახდა ჩატარებულიყო დამატებითი კვლევები და წარმოედგინათ ახალი გარემოზე ზემოქმედების შეფასების ანგარიში.
19 ოქტომბრის განხილვაზე „ტეხური ენერჯის“ წარმომადგენლებმა, ისაუბრეს მდინარე ტეხურზე განხორციელებულ და განსახორციელებელ პროექტებზე, მის ხანგრძლივობასა და შედეგებზე. შეხვედრაზე დამსწრე საზოგადოებას შესაძლებლობა ჰქონდა პასუხი მიეღო მათთვის საინტერესო შეკითხვებზე აღნიშნულ საკითხებთან მიმართებაში.
საჯარო განხილვა წარმოადგინეს: პროექტის მფლობელმა და განმხორციელებელმა კომპანია „ტეხური ენერჯის“ აღმასრულებელმა დირექტორმა მოგელი ტყებუჩავამ, პროექტის ტექნიკურ-ეკონომიკური დასაბუთების შემმუშავებელი კომპანია „გროს ენერჯი ჯგუფის“ გენერალურმა დირექტორმა ანგული ტყებუჩავამ, კომპანია „ტეხური ენერჯის“ პროექტის განვითარების მენეჯერმა გიორგი ტყებუჩავამ.
შეხვედრას ესწრებოდა მარტვილის მუნიციპალიტეტის საკრებულოს თავმჯდომარე ალექსი გაბისონია, მუნიციპალიტეტის გამგებლის პირველი მოადგილე გიორგი გოროზია, საქართველოს გარემოსა და ბუნებრივი რესურსების დაცვის სამინისტროს წარმომადგენელი და ადგილობრივი დაინტერესებული მოსახლეობა.
პროექტი სამ წლიანია და მისი ჯამური ღირებულება 170 მილიონ ლარს შეადგენს.
