აბედათის ადმინისტრაციული ერთეული მდებარეობს სამეგრელო-ზემო სვანეთის მხარის მარტვილის მუნიციპალიტეტში, დასავლეთ საქართველოს ჩრდილო-აღმოსავლეთ ნაწილში, ოდიშის დაბლობზე, მდინარე აბაშის მარჯვენა სანაპიროზე, ზღვის დონიდან 130 მეტრზე. მარტვილიდან დაშორებულია 7 კილომეტრით. ფართობი 38 კვ.კმ.
აბედათის ადმინისტრაციულ ერთეულში შედის ოთხი სოფელი: აბედათი, ლემიქავე, ჯოლევი, ლექაჯაიე. ადმინისტრაციულ ერთეულში ცხოვრობს 2450 სული, კომლთა რაოდენობა შეადგენს 758-ს.
აბედათის ადმინისტრაციულ ერთეულს გააჩნია დიდი პოტენციალი ტურისტული სფეროს განსავითარებლად, რაშიც გამორჩეული არქიტექტურული ძეგლები და მრავალფეროვანი ბუნება უწყობს ხელს. ტურიზმის განვითარების თვალსაზრისით განსაკუთრებულ ყურადღებას იმსახურებს აბედათის ციხე, რომლის ტერიტორიაზე გასულ საუკუნეში, საქართველოს მეცნიერების დამსახურებული მოღვაწის პარმენ ზაქარაიას ხელმძღვანელობით, ჩატარდა არქეოლოგიური გათხრები. ციხის ტერიტორიაზე არქეოლოგიური ნაშთები მრავლად იპოვეს. პარმენ ზაქარაია ვარაუდობდა, რომ ნოქალაქევის ,,საკონტროლო ზონაში’’ იყო აგებული აბედათის ძველი ციხე, და მას IV-VI საუკუნეებით ათარიღებდა, ხოლო აბედათის უკვე შუა საუკუნეებში აგებული ციხე-დარბაზსა და კოშკს დადიანების საგვარეულოს მიაკუთვნებენ. ციხე მდებარეობს ზღვის დონიდან 130 მეტრზე. ასევე ახლად აშენებული წმიდა იოაკიმეს და ანას სახელობის სახელობის ტაძარი, რომელიც მდებარეობს აბედათის ცენტრში.
