მარტვილში დამოუკიდებლობის დღე საზეიმო ღონისძიებებით აღინიშნა.
ამ დღესთან დაკავშირებით ქალაქში გაიმართა არაერთი კულტურული და სპორტული ღონისძიებები.
საკრებულოს თავმჯომარემ ალექსი გაბისონიამ ადგილობრივი ხელისუფლების წარმომადგენლებთან, ახალგაზრდული საკრებულოს წევრებთან და სხვა სოციალური ფენის წარმომადგენლებთან ერთად გვირგვინით შეამკო საქართველოს დამოუკიდებლობისათვის დაღუპული გმირების მემორიალი.
26 მაისის ღონისძიებების ფარგლებში, ტრიფონ ხუხუას სახელობის კულტურის სახლში, დილიდან მოეწყო ნამუშევრების გამოფენა, სადაც წარმოდგენილი იყო, ამალია ჭილაიას, კობა კუპრავას და მათი მოსწავლეების ნამუშევრები.
მთელი დღის განმავლობაში მიმდინარეობდა შეჯიბრებები სხვადასხვა სპორტულ სახეობებში: ფეხბურთი, კალათბურთი, ძიუდო, ფრემბურთი, ლელო, მაგიდის ჩოგბურთი, ჭადრაკი და სხვა, რომელიც კომპლექსური სასპორტო სკოლის ეზოსა და მიმდებარე ტერიტორიაზე ჩატარდა. აღნიშნული სკოლის ორგანიზებით ასევე გაიმართა მარტვილის ჩემპიონატი ნარდში, რომელშიც ასამდე მსურველი იღებდა მონაწილეობას და საპრიზო ადგილებზე გასულებს გადაეცათ ფულადი ჯილდო.
მარტვილის მურთაზ ხურცილავას სახელობის ცენტრალურ სტადიონზე, საფეხბურთო სკოლის ორგანიზებით ჩატარდა „საფეხბურთო ფესტივალი“ რომელშიც მონაწილეობას საფეხბურთო სკოლის არა საშეჯიბრო აღსაზრდელები მონაწილეობდნენ.
დამოუკიდებლობის დღისადმი მიძღვნილი ღონისძიებები კულტურის სახლში გამართული საზეიმო კონცერტით დასრულდა, რომელშიც ადგილობრივი შემოქმედებითი ჯგუფები იღებდნენ მონაწილეობას.
