ჭყონდიდლობასთან დაკავშირებით მარტვილში მთელი დღის განმავლობაში გასართობი და სპორტული ღონისძიებები მიმდინარეობს.
დღესასწაულს სამეგრელო–ზემო სვანეთის სახელმწიფო რწმუნებული გიორგი გუგუჩია მოადგილეებთან ერთად დაესწრო. დღესასწაულთან დაკავშირებით მარტვილის მუნიციპალიტეტს დამეგობრებული ქალაქების დელეგაციები სტუმრობენ.
მთელი დღის განმავლობაში, მსურველებს შესაძლებლობა ქონდათ ტრიფონ ხუხუას სახელობის კულტურის სახლში დაეთვალიერებინათ სახვითი ხელოვნების გამოფენა. ღონისძიებაზე წარმოდგენილ იქნა კულტურისა და ახალგაზრდობის განვითარების ცენტრის გამოყენებითი ხელოვნების ნამუშევრები (პედაგოგი ამალია ჭილაია). კომპლექსური სასპორტო სკოლის ორგანიზებით ჩატარდა სპორტული ღონისძიებები სპორტის სხვადასხვა სახეობებში. საფეხბურთო სკოლის საწვრთნელ ბაზაზე გოგონათა სამოყვარულო ფეხბურთის ჩემპიონატი გაიმართა. მარტვილის მუნიციპალიტეტის ადმინისტრაციული ერთეულების და საგანმანათლებლო რესურსცენტრის წარმომადგენლებმა მეგრული ყოფის ამსახველი ეთნოგრაფიული კუთხეები მოაწყვეს, სადაც დამთვალიერებელს მეგრული სამზარეულოს დაგემოვნება შეეძლო.
მარტვილის მუნიციპალიტეტის მერმა თორნიკე ჯანაშია საპატიო მარტვილელის წოდება მიანიჭა 5 ღვაწლმოსილ მოქალაქეს: ზოია გალდავას, ალექსანდრე გრიგალავას, გოგილო ბასილაიას, ემილი გალდავას და დემურ ახალაიას.
ჭყონდიდლობისადმი მიძღვნილი ღონისძიებები გრძელდება. ამჟამად მარტვილის ცენტრში მთავარ სცენაზე ადგილობრივი შემოქმედებითი ჯგუფების მონაწილეობით კონცერტი მიმდინარეობს. შემდეგ კი მარტვილელების განწყობაზე იზრუნებს ღამის შოუს ბენდი. ღონისძიებას დაასრულებს გრანდიოზული ფოიერვერკი.
გთხოვთ მოიწონეთ და გააზიარეთ:
